Oh svo menningarleg :p

Hæ hæ. Mikið rosalega er ég menningarleg, ég bara verð að skrifa svolítið um það.

Á föstudagskvöldið fór ég í bíó, okei kannski ekkert rosalega menningarlegt nema að þetta var sko ítölsk rómantísk mynd sem heitir Parlami d'amore eða talaðu við mig um ástina. Alveg ágætis ræma svo sem og ég skildi allt sem þurfti að skilja, enda ekki svo flókið að skilja rómantískar myndir hehe.

Þegar myndin var búin fórum við á bar sem er við höfnina eins og svo oft áður. Við hlógum mjög mikið og höfðum pínu hátt.  Allt í einu kemur einn þjónninn með blað sem er kurlað saman. Þegar við opnum blaðið stendur á ítölsku, "þið eruð frábærar, frá þjónunum." Hehe. Við vildum skrifa til baka smá þakkir en það tók sinn tíma. Ég held að það hafi tekið um hálftíma til fjörtíu mínútur að skrifa "takk, sömuleiðis, frá frábæru stelpunum" haha.  Það voru fullt af rifum í blaðinu vegna þess að við hættum svo oft við að skrifa eitthvað og við vorum ekki með strokleður hehe. Sex stelpur og allar frá sitthvoru landinu að ákveða saman eitt svar á ítölsku úff úff.....

Svo á laugardaginn var erasmus partý á Palazza Ducale í miðbænum. Fór seint að sofa og var því pínu þreytt daginn eftir þegar ég fór á annan menningarlegan atburð. 

Þessi mennigarlegi atburður var ballet/danssýning. Passion hét sýningin og var eiginlega svona nútíma dans um alls konar ástríðu og líka um Jesú Krist ef ég náði þessu rétt. Rosalega gátu dansararnir dansað, alveg svaka flott. Í fyrsta skipti sem ég hef séð svona sýningu og varð ekki fyrir vonbrigðum. Hér fyrir neðan má sjá sýninshorn.

 

 

 

 

 
Annað kvöld er svo þriðji menningarlegi atburðurinn en þá fer ég með erasmusum í leikhús, jibbí. Allt á ítölsku og hef ekki hugmynd um hvað leikritið er en vona að það verði gaman.

Svo eins og þig sjáið þá er ég ekki aðeins að djamma heldur einnig að virkja mína menningarlegu hlið hehe. Þið getið svo kíkt á smá myndir frá helginni.

 

 

Vikan sem er að líða.

Á mánudaginn fór ég í minn fyrsta tíma í háskólanum hér í Genova. Fagið var Psicologia dell'Apprendimento, sálfræði náms eða e-ð svoleiðis. Ég var pínu stressuð fyrir tímann en þetta gekk alveg ágætlega. Reyndar skildi ég eiginlega ekki neitt en gerði mitt besta að reyna að fylgjast með og glósa. Hinir nemedurnir hafa  örugglega haldið að ég væri rosa proffi hehe. Verst að ég skildi ekki alveg allt sem ég var að skrifa. Ég er ekki alveg viss hvort ég vilji halda áfram í þessu námskeiði en ég sé til.

Á þriðjudaginn fór ég í fyrsta tímann í Storia dell'arte Moderna, listaögu, og sá tími gekk mun betur og ég held að þetta fag geti verið mjög skemmtilegt.

Í gær fór ég svo á skauta í fyrsta skipti í langan tíma. Það var skipulagt af Gruppo Erasmus Genova en ég er meðlimur í þeim hópi, er meira að segja með kort með mynd og allt hehe. Það var mjög skemmtilegt og mér er sönn ánægja að segja að ég datt ekki einu sinni einu sinni :p. Eftir skautana fengum við okkur heitt kakó með rjóma. 

 

 Í dag fór ég með Andreinu í smá leiðangur. Fyrst fórum við í Vodafone búðina í Sestri (rétt hjá Multedo) til þess að athuga með svokallaðan Vodafone key eða internet key. Með þessum usb lykli er víst hægt að fara á internetið hvar sem er. Þetta gæti verið mjög sniðugt fyrir mig þar sem það er ekki internet tenging í íbúðinni sem ég flyt í.  Ég ætla samt að hugsa málið og sjá hvort það borgi sig, best að spyrja Riccardo eins og Andreina sagði :).

Ég og Andreina fórum einnig að fá okkur Aperitivi í Sestri. Við sátum úti því í dag var rosa gott veður, sól og allt. Eftir aperitivo lá leiðin í Ikea. Það var alveg eins og að vera komin aftur heim til Íslands, ekki mikill munur á ikeabúðunum hehe. Ég keypti mér lak, kerti og inniskó :).

Á morgun ætlum við, erasmusar, að skella okkur í bíó á einhverja ítalska bíómynd og á laugardaginn er svo erasmus partý jibbí. 

Læt nokkrar myndir frá skauta-ævintýrinu fylgja.

Góða helgi :).

 

 

 

         

Nervi

Í gær fór ég með Söndru (frá Sviss) og Viki (frá Kanada) til Nervi. Nervi er lítill bær rétt hjá Genova. Ég vaknaði klukkan um hálf níu til þess að ná því að taka strætó niður í bæ og hitta stelpurnar klukkan 11. Ég varð pínu pirruð þegar ég var að bíða eftir strætó því einhver svona krípí krípí gamall kall starði á mig. Ég þoli ekki þegar fólk bara starir og svo hættir það ekki einu sinni þegar maður horfir á það til baka. Mér finnst það svo dónalegt og auðvitað rosa óþæginlegt. En allaveganna þegar ég kom í miðbæ Genova var ég að frjósa, það var alveg ógeðslega kalt. Kaldara en það hefur nokkurn tímann verið síðan ég kom hingað. Ég gleymdi húfunni minni heima svo að ég meira að segja keypti mér ódýra húfu áður en vil héldum af stað til Nervi. (Ég held að þessi húfa myndi gera Ödda stoltan hehe)

Ég Sandra og Viki tókum svo stætó saman til Nervi og það tók um 25 mínútur. Nervi er rosa sætur og rólegur bær með mjög vinsamlegu fólki, reyndar finnst mér Ítalir yfir höfuð vera vinsamlegt fólk.

Þið getið séð hér að neðan hvar Nervi er, til hægri við Genova við sjóinn. Multedo er hinum megin á milli Sestri og Pegli. (Stendur ekki á kortinu). 

Í Nervi var svo miklu betra veður,  ekkert smá skrítið. Bara rétt hjá Genova og miklu hlýrra. Við gengum gangstíg við sjóinn og kíktum í einhvern almenningsgarð, mjög fínt. Síðan tók við um 30 mínútna leit að veitingastað. Loksins settumst við úti á veitingastað við hafið. Það var svo hlýtt að sitja þar úti að það var eins og um sumar, alveg æðislegt! Ég var þarna bara á bolnum að borða ís í sólskini og furðaði mig á því að aðeins um þrem tímum áður hafði ég keypt mér húfu því mér var svo kalt. Alveg fáránlegt hehe.

Síðan þegar við komum aftur í bæinn, til Genova, bjargaði húfan mér aftur því þar var vetur.  

Í gærkvöldi elduðum við þrjár svo saman heima hjá Viki. Það var mjög fínt. Í dag er ég kvefuð og ætla ekki út vegna þess að skólinn byrjar á morgun og ég verð að vera frísk fyrir skólann :p.

 

Búin að finna íbúð :p

Hæ hó ég er búin að finna íbúð jibbí jei, eða það er að segja herbergi í íbúð.

Íbúðin er í götu sem heitir Via Pagano Doria og er númer 5, gott að vita ef þið ákveðið að kíkja í kaffi. :p Ég flyt inn 1. mars og verð þá hjá Andreinu þangað til, hún er svo góð að leyfa mér að vera. Stelpan sem býr í íbúðinni er rosa almennileg. Mér finnst líka gott að búa ekki í troðfullu húsi. Ein stelpa býr með sex öðrum stúdentum og þau þurfa öll að nota eitt baðherbergi, það er svolítið þröngt finnst mér. Íbúðin mín er hreinleg og hitunin í húsinu á víst að vera betri en gengur og gerist. Það er stór plús þar sem það er eiginlega alltaf kalt í húsunum hérna á veturna. Eini gallinn við íbúðina er sá að það er ekki internet :/ en ég verð þá bara að fara á internetið í skólanum og á svona internet kaffihúsum, það hlýtur að vera nóg.

Ég byrjaði í ítölskutímum á þriðjudaginn og er búin að fara í tvo tíma. Tímarnir verða alla þriðjudaga, miðvikudaga og föstudaga frá 16-18. Ég tók svona stöðupróf og lenti í hópi tvö af þrem hópum. Ég er með Pegli strákunum í tíma og fullt af fólki frá Portúgal og Frakklandi. Kennarinn er ung kona og hún er alltaf að sussa á okkur, ég held að hún sé vön því að kenna litlum krökkum hehe. En hún er mjög indæl og er alltaf brosandi, þegar hún er ekki sussandi. Enn sem komið er eru tímarnir frekar auðveldir en ég vona að þeir eigi eftir að þyngjast svo ég læri meira, oh ég er svo námsfús hehe;).

Bæði í gær og á þriðjudaginn fórum við eftir ítölskutímann á kaffihús saman, erasmusarnir, og ég elska svona aperitivo! Þetta er svo sniðugt, maður bara kaupir sér einn drykk (bjórinn hefur hingað til verið vinsælastur) og svo borðar maður frítt. Á sumum stöðum er meira að segja svona hlaðborð, alveg frítt. Reyndar er bjórinn á þessum hlaðborðsstöðum svolítið dýrari en annars staðar en þá fyllir maður bara diskinn ;). Þá þarf ekkert að elda (ekki að það hafi verið vandamál hingað til hjá mér þar sem það er alltaf kvölmatur heima í Multedo). 

Um helgina kíki ég kannski eitthvað út fyrir bæinn með Söndru og fleirum. Ágætt að nýta tímann áður en skólinn byrjar.

Ég held að ég byrji í tímum á mánudaginn, en ég er enn að reyna að læra á kerfið hérna. Mér skilst að maður fari bara í þá tíma sem maður vill og svo verður maður bara að passa sig á að skrá sig í rétt próf. Ég er nokkuð viss núna hvaða fög ég vil taka en svo verð ég bara að sjá hvernig gengur að læra á ítölsku. Einn franskur gaur benti mér á að taka ensku, eitt svona létt fag, bara til þess að fá meiri einingar. Hann ætlar að gera það þó svo að það sem hann er að læra komi því eiginlega ekki við svo kannski ég geri það bara líka, hver veit. 

Annars er allt gott að frétta héðan frá ítalíu, veðrið er búið að vera mjög fínt. Það er alltaf sól en svolítill vindur.  Jæja verð að fara að læra fyrir ítölskutímann á morgun. 

Læt fylgja með mynd af mér og Kristófer sem var tekin rétt áður en ég fór út. :)

Sirkus og fleira

Í gærkvöldi fór ég í fyrsta skipti á ævinni í sirkus. Það voru alveg fullt af litlum krökkum en að var mjög viðeigandi því mér leið svolítið eins og krakka líka. Riccardo og Lucia (bróðir Fabio og kærasta hans) buðu mér.  Það var margt skemmtilegt að sjá en það sem mér fannst magnaðast var þegar fimm lítil mótorhjól keyrðu um í lítilli kúlu allir á sama tíma. Það var alveg svakalegt. Svo voru líka púddluhundar og svona poný poný dverghestar, alveg ógeðslega sætir, sem gerðu alls konar kúnstir saman. Það var mjög flott líka.  Mjög skemmtileg fyrsta reynsla af sirkus. :)

Enn eru margir erasmus nemar húsnæðislausir líkt og ég. Ég er þó svo heppin að þurfa ekki að borga fyrir gistingu á hosteli. Fimm erasmus strákar ákváðu að leigja húsnæði á vegum SASS, skemmtilega skrifstofan fyrir útlendinga, í Pegli. Pegli er aðeins lengra í burtu frá miðbæ Genova en Multedo þar sem ég er nú (fyrir mig tekur um 40 mínútur í bæinn með strætó). Þessir gaurar eru Eduardo frá Spáni, Jonas frá Svíþjóð, Miku og Niku frá Finnlandi og úps ég man ekki alveg frá Þýskalandi. Í fyrradag fór ég með þeim ásamt Isabelle frá Spáni að skrifa undir samninginn fyrir íbúðina. Þá var þeim sagt að fyrri leigendur hefðu ekki borgað rafmagnsreikninginn og því yrðu þeir líklega rafmagnslausir í viku. Og vegna þess að það er ekkert rafmagn þá er heldur ekkert heitt vatn.......úps æi greyin. Veit ekki hvort það komi málinu við en okkur var sagt að fyrri leigendur hefðu verið vændiskonur......og ég sem hélt að Pegli væri svo saklaus staður, en ætli þær séu ekki í hverjum bæ. Þegar við komum út af skrifstofunni talaði Miku eða Niku við mig (man aldrei hvor er hvað) og sagði að hann væri ekki svo viss um íbúðarvalið :/ svo ég reyndi eftir bestu getu að hughreysta hann og minnti hann einnig á að skipta á rúmfötunum haha :P.

Í kvöld er ég að fara á fyrsta official erasmus partýið. Eða allaveganna er einn staður sem auglýsir ódýran bjór í kvöld fyrir erasmusa. Vonum að það verði fjör.

Á mánudaginn fer ég svo að skoða íbúð í miðbænum. Þar býr ein 26 ára ítölsk stelpa, ég vona að ég fái þá íbúð (herbergi í íbúð). Ég fór á miðvikudaginn að skoða aðra íbúð (herbergi í íbúð) en mér leist ekki á hana....hún var svolítið of skítug fyrir minn smekk, kannski er ég of mikil pempía en ef það er ekki hreint þá get ég ekki sofið :/. 

Annars allt gott :)  Kíkið á hjólin í kúlunni! (þ.e.a.s. ef ég næ að upphlaða því).

Já ítalir virðast elska pappíra

Ok þá er ég búin að vera hér í Genova í viku og það gengur allt bara vel, myndi kannski ekki segja eins og í sögu en já gengur skemmtilega. 

Ég er loks búin að ná því að innrita mig í háskólann og það var sko meira en að segja það. Ég þurfti að fara þrisvar sinnum bara til þess að skrá mig í skólann. Þrjá mismunandi daga!!! Skil ekki þessa opnunartíma. Anyway fyrst á föstudag til að fá eitt blað. Svo á mánudag til að gefa það blað og fá annað í staðinn. Svo á þriðjudag til þess að gefa það blað og fá einhverja einkunnabók og kort í staðinn. Veit eiginlega ekki alveg enn hvað þetta þýðir allt saman fyrir mig en held að það sé bara best að gera það sem mér er sagt, þegar ég skil það sem sagt er þ.e.a.s. hehe. En sum sé nú get ég farið að einbeita mér að finna kennara sem leyfa mér að taka námskeiðin sín. En vegna þess að hér á Ítalíu er ekki mjög algengt að fólk tali ensku þá þarf ég að velja sérstakalega fög þar sem kennarinn kann ensku. Veit ekki enn hvaða fög það eru en nei nei nei ég er ekkert stressuð....:/

Ég er búin að kynnast nokkrum erasmus nemum og líkar, enn sem komið er, við alla. Fyrst hitti ég þrjá stráka, einn er danskur og tveir frá Tyrklandi. Þeir eru allir mjög fyndnir, enginn af þeim kann orð í ítölsku fyrir utan sí og no og annar tyrkinn kann heldur varla stakt orð í ensku :/. Tyrkirnir eru samt mjög bjartsýnir og ætla að taka SJÖ FÖG Á ÍTÖLSKU. Skil ekki alveg hvernig þeir ætla að fara að þessu, og ég sem var að stressa mig á minni litlu ítölsku og þrem fögum. Danski Jesper mjög laid back kannski svona eins og danir eru oft. Hann er ekki mikið að stressa sig á skólanum eða hvaða fög hann ætlar að taka. Hann talaði um að kannski tæki hann svona eitt ef hann nennti. Ég held að hann sé meira bara svona að tjekka á því hvernig bjórinn bragðast á Ítalíu. 

Síðan er norskur strákur Knud, tveir finnskir strákar Niku og Miku......og nei ég er ekki að grínast hahaha. Spænskur strákur, pólskt par og tveir sænskir strákar.

Ég fór með þeim öllum á skrifstofu sem kallast SASS. Þessi skrifstofa er fyrir útlendinga og sér um allt svona sem snýr að dvalarleyfi og svoleiðis. Einnig segjast þau hjálpa útlenskum nemendum að finna húsnæði. Þessi skrifstofa er ekkert smá fyndin eða réttara sagt konan sem vinnur þarna er "fyndin". Hún talaði yfir fullt herbergi af útlendingum alveg rosalega hratt og allt á ítölsku. Svo þegar pólski gaurinn sagðist ekki skilja bölvaði hún bara honum á ítölsku og hélt áfram. Ég hefði sprungið úr hlátri, því þetta var svo fáránlegt, ef ég hefði ekki verið svona skíthrædd við hana.

Ég skildi mest af því sem hún sagði samt, allaveganna nóg til að skilja að það væru engar íbúðir að hafa fyrir okkur, hjá þeim. Danski strákurinn var þegar búinn að finna íbúð en kom samt með okkur á skrifstofuna. Þegar ítalska konan sá að hann var ekki að hlusta (sem reyndar átti við um marga því það var svo erfitt að skilja) spurði hún hann hvað hann væri að gera þarna. Þegar hann loks skildi hvað hún var að segja sagði hann: oh me,  I'm just waiting for the turkish guys.......og ég get svo svarið það, konan eiginlega bara flippaði og rak hann út, bókstaflega bannaði honum að vera þarna. Þegar við vorum svo að fara kom einn gaur sem er að vinna þarna og afsakaði samstarfskonu sína því hún væri nefnilega að reyna að hætta að reykja.....hahaha :P

En mjög skemmtilegt og viðburðaríkt í Genova. Kossar og knús a tutti :)

 

 

Komin til Genova

Þá er ég komin til Genova.

Flugið gekk bara vel, frekar lítil flugvél, myair heitir flugfélagið. Ég lenti við hliðina á ítölskum manni sem talaði mjög mikið um skó. Hann er að vinna fyrir skófyrirtæki og var að koma frá París þar sem hann gekk á milli skóbúða og talaði við skóbúðareigendur um skóna sína og þeirra skó og blablabla. Fínasti kall bara, en ég hefði kannski valið annað umræðuefni. Hann talaði einnig mikið um það hvað það væri leiðinlegt að ferðast með nískum yfirmanni sínum en virtist ekki hafa minnstar áhyggjur af því að sá hinn sami yfirmaður sat hinum meginn við hann. Sem betur fer var flugið frá París aðeins klukkutími og tíu mínútur.

Í morgun fór ég upp í háskóla og beið mjög lengi áður en ég fattaði að ég var á vitlausum stað að bíða. Ég átti víst að fara einni hæð ofar. En allaveganna gekk þetta næstum því að lokum. Á mánudaginn þarf ég að fara aftur á sama stað til þess að láta einhvern fá þá pappíra sem ég fékk í morgun. En í dag þegar ég loks fékk þessa pappíra var búið að loka skrifstofunni sem tekur á móti þeim, en það var um hádegi. Nota bene þessar tvær skrifstofur eru á sama staðnum, bara á mismunandi hæð. Vitlausi staðurinn fyrr um morguninn var sem sé ekki svo vitlaus eftir allt saman. Skil ekki alveg af hverju skrifstofan sem gaf mér pappírana í morgun lætur ekki bara hina skrifstofuna fá pappírana beint.....allt mjög skondið samt hehe.